ဘယ်လိုခေါ်ရမလဲ

 ကတ်သရင်းတစ်ယောက် လူသစ်တွေနဲ့ တွေ့တဲ့အခါ အမြဲကြုံတွေ့ရတဲ့ ကြောင်တောင်တောင် ပြဿနာကတော့ "ဘယ်လိုခေါ်ရမလဲ" မသိတဲ့ ပြဿနာ ဖြစ်ပါတယ်။ မြန်မာစကားမှာက အသက်တော်တော်ကြီးကြီး ဆံပင်ကလည်း ဖြူနေပြီဆို အဘွား၊ ကိုယ့်ထက် ၁၅နှစ်နှင့်အထက်ကြီးရင် အန်တီ၊ ကိုယ့်ထက် ရာထူးကြီးရင်/ရုပ်ရင့်နေရင် အစ်မ၊ ဟော တစ်ရက် တစ်လလောက် ငယ်ပြန်တော့ ညီမ.. စသဖြင့် ခေါ်ရပါတယ်။ တစ်ခါတလေကျ သူတို့အသက်ကို မမှန်းမိတာတို့၊ မမလို့ ခေါ်တာမှ ကြိုက်တဲ့သူကို အန်တီသွားခေါ်မိတာတို့ ဆို အဲ.................. ဆိုပြီး အားနာရပါတယ်။ အဲဒီတော့ လူတစ်ယောက်ကိုစစချင်း တွေ့ရင် သူတို့က အဖျားဆွတ်ခေါ်လို့ရမဲ့ နာမည်မျိုး ပြောပြီး မိတ်ဆက်တာမျိုးဆို အရမ်း အဆင်ပြေပါတယ်။ နို့မို့ရင်တော့ ချွေးပြန်ပေတော့ပဲ။ 

မိန်းမတွေက တော်ပါသေးတယ်။ ယောက်ျားတွေက သာဆိုး။ သူတို့မှာ ရည်းစား ဆိုတာတွေက ရှိတတ်ကြတော့ ကိုယ့်ထက်ကြီးနေလို့ "အစ်ကို" သွားခေါ်ရင် သူတို့ရဲ့ ဘင်္ဂလားညီမလေးတွေက မကြိုက်ကြဘူးတော့်။ "ငါ့ကိုကိုကို ဘယ်သူက အစ်ကိုလို့ ခေါ်တာလဲ" ဆိုပြီး သဝန်တို၊ ဟော နာမည်ရှေ့မှာ "ကို" တပ်ခေါ်ပြန်တော့လည်း "အဲဒါ ငါခေါ်တဲ့နာမည်" ဆိုပြီး ကန့်သတ်ကြ၊ တော်တော်လည်း တတ်နိုင်ကြတယ်။ အဲဒါကြောင့် အတတ်နိုင်ဆုံးတော့ မြန်မာလို မပြောရအောင် ရှောင်ချင်ရှောင် (အင်္ဂလိပ်လိုကျ you and I မို့ ပြဿနာမတက်)၊ နို့မို့ရင် "ရှင်နဲ့ ကျွန်မ" ပဲ။ ကဲ ကောင်းရော။ 

အဲ.. အခု ပြဿနာတက်နေပြန်တာက အီစီကလီလုပ်နေတဲ့သူကို ဘယ်လိုခေါ်ရမလဲ ဆိုတာပါပဲ။ နင်နဲ့ငါ လို့ ပြောရအောင်လည်း ဟိုက အသက်ကြီးနေပြန် (ဪ သူ့ကို တခြားသူတွေက ဆရာတောင် ခေါ်ကြတော့ နည်းနည်းလန့်)၊ ဟော.. နာမည်တစ်လုံးကို အဖျားဆွတ်ခေါ်ပြန်တော့လည်း အစတုံးက ကိုယ်က ခပ်တင်းတင်းလုပ်ထားတာဆိုတော့ "အခုကျမှ ဘာဖြစ်ပြန်တာလဲ" ဆိုပြီး ကြောင်ကြည့်နေပြန်ရင် ဒုက္ခ၊ ဒါမျိုးအတွက် လူတိုင်းလိုက်နာရမဲ့ စည်းကမ်းဆိုပြီးလည်း မပြဌာန်းထားပြန် ဆိုတော့ မမကတ်သရင်းတစ်ယောက် ဒုက္ခပင်လယ်ဝေနေပါပြီ။ သိတဲ့သူများ ကယ်တင်တော်မူကြပါဦး お願いします🙏🙏🙏🥹🥹